Пред да судиш - провери ги фактите и разбери го контекстот.

  

    Во време кога информациите се шират со голема брзина, медиумската писменост и одговорното информирање се поважни од кога било. Пред да споделиме, коментираме или донесеме заклучок, важно е да ги провериме фактите и да го разбереме контекстот. Особено кога станува збор за успесите на децата, секој збор што ќе го напишеме може да биде поттик, но и разочарување. Затоа, да се водиме од точност, објективност и почит, а пред сè - да ги ставиме децата и нивниот труд на прво место.

Воедно, би упатила искрен апел и до колегите. При пишување колумни, објави или давање интервјуа, да не го занемаруваме придонесот на сите што учествувале во заедничката работа. Успесите ретко се резултат на трудот на еден човек - зад нив често стојат колеги, ментори, наставници и соработници кои вложиле знаење, време и поддршка. Признавањето на нивниот придонес не ја намалува вредноста на ничиј успех, туку покажува професионалност, интегритет и почит.

Да бидеме добар пример за учениците. Ако тие од нас научат да ги ценат туѓиот труд, соработката и заемната поддршка, истите вредности ќе ги пренесат и понатаму. Само така можеме да градиме заедница во која успесите навистина ќе бидат повод за заедничка радост и гордост.

MATHEMATICS WITHOUT BORDERS - FINAL 2026



Почитувани,

Ве молам да не ги доведуваме во непријатна ситуација нашите млади математичари - Македон, Јана, Софија, Коста и сите останати.

Пред нив е светла иднина и навистина заслужуваат да бидат спомнати во секој напис и во секоја објава. Сите се наши деца, сите се успешни и сите ја претставуваат Македонија на најдобар можен начин.

Да не се делиме по градови, училишта, клубови или семејства. Да се радуваме на секој успех, затоа што секој успех на едно наше дете е успех и за Македонија.

Би сакала да разјаснам и една важна работа. Натпреварот „Математика без граници“ во Несебар е престижен меѓународен турнир, но не е олимпијада. Олимпијадите имаат поинаков систем на селекција - до нив се стигнува преку државни натпревари и строга селекција, при што се избира национален тим што ја претставува државата.

„Математика без граници“ е меѓународен турнир на кој учествуваат ученици од повеќе држави. Во текот на годината се организираат повеќе квалификациски кругови, а најуспешните се пласираат на финалето во Несебар. Турнирот е осмислен така што на голем број ученици им овозможува да се натпреваруваат, да стекнат искуство, да ја засакаат математиката и да добијат мотивација за понатамошен развој.

Ова во никој случај не го намалува успехот на децата. Напротив, секој освоен медал е резултат на вложен труд, знаење, упорност и љубов кон математиката. Затоа секое дете заслужува искрена честитка и поддршка.

(Направиме во иднина да имаме уште повеќе натпреварувачи од Македонија. Информирајте се - на споделениот линк можете да најдете задачи за вежбање, примери од задачи што биле дадени на натпреварот, како и информации за условите за учество и котизациите.Со навремена информираност и поддршка, можеме да им овозможиме на уште повеќе ученици да се вклучат, да стекнат искуство и да ги покажат своите знаења.)

Би сакала да потсетам и на уште нешто. Овие деца учествувале затоа што нивните родители и наставници им овозможиле да бидат дел од овој турнир. Наместо да ги споредуваме или да ги ставаме во непријатна положба, да ги охрабриме и да им се радуваме. Тие не ги создаваат правилата на натпреварите - тие само учат, се натпреваруваат и искрено се радуваат на својот успех.

Ве молам да внимаваме на зборовите што ги пишуваме. Децата ги читаат нашите коментари. Наместо негативни реакции, да им подариме поддршка, охрабрување и искрена честитка. Тоа ќе го паметат многу подолго од секој медал.

Истото важи и за нас, возрасните. Кога колеги заеднички реализираат работилници, обуки, семинари или меѓународни активности, убаво е во објавите да се спомнат сите што придонеле. Така испраќаме порака дека знаеме да се радуваме на заедничките успеси и дека се почитуваме меѓусебно.

Да не создаваме поделби таму каде што не треба. На меѓународни натпревари сите сме од една држава и сите ја претставуваме Македонија. Токму затоа е важно со својот пример да ги учиме децата на меѓусебно почитување, соработка и достоинство.

На сите ченици - учесници на натпреварот - Математика без граници,  им честитам. Продолжете да учите, да истражувате и да верувате во себе. Со труд, дисциплина и љубов кон математиката, многумина од вас еден ден ќе бидат дел од македонскиот олимписки тим и ќе ја претставуваат нашата држава на највисоко ниво.

Ви посакувам добро здравје, многу радост и уште поголеми успеси. Патот што сте го избрале е вистински. Со мали, сигурни и упорни чекори се стигнува најдалеку. Не престанувајте да чекорите - најубавите успеси допрва ве очекуваат, особено кога ќе чекорите заедно.

Кој сака подетално да се информира за натпреварот, може да ги погледне правилата и информациите на официјалната страница:

https://www.mathwithoutborders.bg/

Во текот на натпреварувањето, учесниците сами ги покриваат трошоците за котизација за поединечните кругови. За учесниците од Македонија кои ќе се пласираат во финалето, котизацијата за финалниот натпревар ја покрива Министерството за образование и наука (МОН), согласно важечките услови и одлуки.