Час 1: Вовед во медиумска пристрасност

Цели на часот:
- Да се разбере што е медиумска пристрасност.

- Да се научат различните видови на пристрасност во медиумите.

- Да се поттикне критичко размислување за тоа како пристрасноста влијае на перцепцијата на информациите.
 
Што е медиумска пристрасност?
Медиумската пристрасност е систематско фаворизирање на одредени гледишта, информации или перспективи во медиумските содржини. Таа може да се појави намерно или ненамерно и има значајно влијание врз јавната перцепција и донесувањето одлуки.
 
Клучни прашања за разгледување: 
- Кој е изворот на информацијата?
- Дали медиумот има политички, економски или идеолошки интерес?
- Кој е публиката?
- Како медиумот ја прилагодува содржината за да ги задоволи    

  очекувањата  на својата публика?

-  Како се користи јазикот?
 
Пример: Зборовите „борец за слобода“ наспроти „терорист“ за истата личност.    Кои информации се вклучени или изоставени?
Изборот на факти и детали може да ги обликува заклучоците.
 
Видови медиумска пристрасност:
Пристрасност на изворот
Користење на информации само од одредени извори, игнорирајќи други.
Пример: Медиум кој се повикува само на владини извори.
 
Пристрасност во прикажувањето на настани
Пренесување на информации преку сензационалистички наслови или со специфичен тон.
Пример: Вести кои фокусираат на негативни аспекти на одредена група.

Пристрасност преку избор на теми
Изборот кои настани се покриваат, а кои се игнорираат.
Пример: Одреден медиум известува само за позитивни аспекти од работата на одредена политичка партија.
 
Идеолошка пристрасност
Промовирање на одредени идеологии (конзервативна, либерална и сл.).
Пример: Претставување на економски проблеми исклучиво преку идеолошка перспектива.
 
Визуелна пристрасност
Користење на слики, графики или видеа кои ја поттикнуваат емоционалната реакција на гледачот.
 
Активности за часот:
Дискусија:
Донесете различни примери на вести и разговарајте за тоа дали постои пристрасност во нив.
 
Анализа на насловите:
Дадете на учениците сет од наслови на вести и побарајте од нив да идентификуваат пристрасност во јазикот.
 
Игра „Детективи за пристрасност“:
Поделете ги учениците во групи и дајте им различни медиумски извори за ист настан. Потоа, тие ќе ги споредат извештаите за да откријат како пристрасноста се манифестира.
 
Клучни поенти:
Медиумската пристрасност е неизбежна, но може да се препознае и разбере.
Развивање на критички пристап кон медиумите помага да се избегнат манипулации.
Секој медиум е создаден за да комуницира со специфична цел и порака.
 
Домашна задача:
Изберете два медиуми што известуваат за ист настан (на пример политички говор или спортски натпревар) и споредете ги нивните извештаи. Напишете краток извештај за тоа како се разликуваат и дали можете да забележите пристрасност.